"IАЬРЖА КХАЬРА" ЯХАЧА ГУЛЛАМАХ

Тахан кховзткъе вурийтта шу дуз вай къам мехках даьккха, боарам боаца бала Даймехка цу хана 1отIабесса. 
Ше ма дарра дIаяхача халача заман сурташ кхолл йоазанхош "Iаьржа кхаьра" яхача кинижка юкъе яхача байташца.  2014 шера вай Къаман библиотекас арахийца из кинижка довза, деша тIахьеха аз поэташ вай къам мехках даккхарах мишта яздаьд ха безам болаш мел вар.
Уж хала ханаш лайна ба вай цIихезза бола йоазанхой: Яндиев Джамалда, Осмиев Хьамзат,  Плиев Махьмад-СаIид, Чахкиев СаIид, иштта кхыбараш а.
Гуллама юкъе яхай цар дог тохадолийташ йола байташ. Кхыметтел, шоай чулоацамца хинна ца Iеш, цхьан  цIерашца тIехь дукха  дувц вайга цу байташ: "Даймохк дагаухар сона" (Осмиев Хьамзат"),  "Къаьра кхаьра" (Хашагульгов  Iаьла), "Вай къина делхар лоамаш" (Угурчиев Азамат-Гири), "Мехка бала" (Хамхоев Ваха), иштта кхычар. Уж поэзеца чам барашта йовзаш, езаш я. 
КIезигагIа яьржа яле а, дика язъяь, дешачарий безам тIабаха я цу гуллам чура зIамагIа болча йоазанхой байташ а. Шоаш мехках бахара Iазап текха беце а, къам дезара бахьандолаш вIаштIехьдоал цар долчча бесса из дувца.
Дукха я эрсий меттал вай йоазанхош геттара дика язъяь стихаш а. Къаьстта теркалъе безам ба кхыча къамах болча поэташ шоай дега чу гIолла вай къаман тIабена хинна бала лутташ язъяьраш (Ляпин Игорь, Сулейменов Олжас, Анисимова Светлана,  и.кх.дI.).  
Ший форматага дилча доаккха доацача книжка чулоацамо дувц вайна г1алг1ай къамано мел лайнар, поэзен наькъашца хьахьокх цун къонгий-мехкарий турпала денал, яхь, эздел. Из дийшачун шийна хьаэца дуккха короргда цун оаг1онаш т1ара. 
Хинна даьннар хувца йишъяц, де хIама дац, цхьабакъда,  йишъя вай из даим дагалоаттаде, цу халача хана байнача наха тIехьа сагIа дала, ламаза-дуIашца,  кхоллама балхашца хьоахабе.
ДоккхагIа долча ноахало вай кхоане лоръеш лайна халонаш йиц ца е хьаькъал, иман, яхь хийла вай.
Дала гешт долда бала лайна, хало Iайша дIабаьннача вай дайха-ноаноех, ялсмаленца дикахетар долда царна! 
Дала лорадолда вай къам, кхоане беркате, иразе хургйолаш!